សៀមរាប៖ មហាជនអ្នកលេងបណ្តាញសង្គម Tik Tok ចាប់អារម្មណ៍ជាខ្លាំងចំពោះវីដេអូជនបរទេស Vlogger ម្នាក់ ជាមួយស្ត្រីអាជីវករលក់វត្ថុអនុស្សាវរីយ៍នៅផ្សារចាស់ ខេត្តសៀមរាបដែលចេះនិយាយភាសាអង់គ្លេសឆ្លងឆ្លើយបែបកំប្លែងស្ងួតដើម្បីទាក់ទាញអតិថិជន ដោយវីដេអូនោះមានអ្នកទស្សនារហូតដល់ជាង ៤លានដង។

ក្នុងវីដេអូ Vlogger ឈ្មោះ Chris លោកបាននិយាយរាក់ទាក់ដោយសួរទៅស្ត្រីអាជីវករនោះជាភាសាអង់គ្លេសដែលមានន័យថា តើអ្នកសុខសប្បាយជាទេ? ស្ត្រីអាជីវករឆ្លើយថា មិនសុខសប្បាយទេ ពីព្រោះគ្មានលុយ។ លោក Chris សួរទៅស្ត្រីអាជីវករនោះថាតើអ្នកឈ្មោះអ្វី ស្ត្រីនោះក៏ឆ្លើយថា ខ្ញុំឈ្មោះ I Love Money ហើយខ្ញុំដឹងឈ្មោះរបស់អ្នក គឺ You have money។

របៀបនៃការនិយាយទាក់ទាញរបស់ស្ត្រីអាជីវករបានធ្វើឱ្យបុរស Vlogger ម្នាក់នោះផ្ទុះសំណើចជាខ្លាំង និងកោតសរសើថាប្រជាជនកម្ពុជាមានភាពរាក់ទាក់ និងរួសរាយគួរឱ្យចូលចិត្ត និងស្រឡាញ់។

Chris ជា Vlogger ម្នាក់ដែលបង្កើតមាតិកាបរិភោគអាហារតាមផ្លូវ និងអាហារតាមតំបន់គ្រប់បណ្តាប្រទេស ដែលទទួលអ្នកទស្សនារាប់លាននាក់៕